SANDAKAN: Vozoon Montili Sabah, Datuk Seri Musa Haji Aman, minoboos pilotian puu tinimungan koumohigan i pakalaja id poompus timpu nopo nga iso pongkimamaan tagazo lati dino id suang kotundaan pogun.
Tumanud disido, mantad po toi tadau-tadau koubasanan toi ko kalamazan nga pongkimamaan dioho i tomoimo mongintong koumohigan kaanu nodii potitikid mogiigizon mamalamai koponoimaan id suang koozuzuvo di otoonong om osuau.
Minoboos isido, sakadai kotuhungan om pongkimamaan tinimungan koumohigan tomoimo hogoon do boogizan Polinta Pogun i au insan kohiiu kotuhungan dioho nogi tuutulus manaak mogisusuvai sakadai sabaagi tanda pamahagaan potitikid timpu koikatan kalamazan miaga do hari raya Aidilfitri.
Ka disido, pongkimamaan di totuhid kozo id boogizan agama diti apatut pantangon hoohobi po vagu asansagan koinsodu miampai paganakan montok no mintamong om papataan kedaulatan pogun mantad nuununu sangod.
“Polinta pogun tomoimo momohoogo pilotian tinimungan koumohigan miaga do puu susumangod i pakalaja poompus timpu id pivohitan… mangazou nogi kozo tokou takakavas kotuhungan om pongkimamaan diozu saviavi.
“Iti saasabap no, tonggungan tagazo diti nakaanu nodii potitikid mogiigizon papanau koposizon di otoonong miampai aadang… ounsikou tokou miampai tonggungan puu tinimungan koumohigan di papanau kalaja miampai poimponu dedikasi sohinaid diti,” ka disido.
Pinopoiho i Musa dino ontok minamason id Lamai Kopotunuzan Sakadai kumaa Tinimunga 22 RAMD kopiondot Vuhan Ramadan al-Mubarak id Kem Sri Kinabatangan, Batu 7, somok doiti, di koniab.
Nokotindapou nogi Puu Parlimen Libaran, Datuk Juslie Ajirol, Puu Dewan Koundangan Pogun (Adun) Gum-Gum, Datuk Zakaria Mohd Edris; Panglima Briged Kohimo Infantri Malaysia, Brigadier Jeneral Datuk Ranjit Singh Ramdey; Upisol Momolinta 22 RAMD, Lt. Kolonel Asri Shukor om Polosiden Kounsol Kakadazan Sandakan (MPS), Datuk Ir. James Wong.
Adun Sungai Sibuga om Huguan Umno Boogizan Libaran dino nga otumbazaan lamai diti kaanu popogiot pionitan silaturahim i tuutulus kopoimbuhai pionitan pisokodungan di togiot montok timpu dumonto pogun.
Mantad dino, magangat isido layat i nadadi mato om tohingo polinta mooi do manaak pisokodungan poimponu dino kumaa tinimungan koumohigan montok momogompi kotoonongon di naanu.
Id lamai dino, pinopotunui i Musa sakadai Ramadan kuminaa tinimungan 22 RAMD kaampai no tanak ngavi dioho i nakapaas id suang boogizan balajalan nga nokotoimo do usin raya.
Pinopotunui nogi i Musa sakadai koumatan magansak ketuhar om misin monombi kumaa tinan koponuhungan tinimungan 22RAMD i pinotunui kumaa boogizan Tinan Kotundunan Tinimungan Susumangod (BAKAT) Kem Sri Kinabatangan.
Pinopohombus nogi isido kapanadaan iso tampat pomoinan futsal montok gunoon tuhun 22 RAMD om kololoizan paganakan miampai sipoot.
NewSabahTimes
SEMPORNA: Ahal koumohigan pogun okon nopo tonggungan boogizan Puu Koumohigan nogi ino popoompit tonggungan tinimungan mogiigizon posoihi tu ino nopo nga kopotutan saviavi.
Minoboos diti i Huguan Pulis Sabah, Komensiner Datuk Hamza Taib ontok pinopoimagon Balai Pulis id Pulau Bum-Bum, di songkoniab.
Nokotindapou nogi id lamai dino hahansanon layat Bugaya Datuk Hj. Ramlee Hj. Marhaban, Datuk Dr Jaujan Hj Sambukung Hahansanon Layat Sulabayan, Upisol Uvang Semporna, A.M Ibnu Babam, Huguan Pulis Uvang Semporna miampai hobi 200 mogiigizon kampung dino.
Tumanud di Hamzah, kinantakan ponugkuan id Lahad Datu Vuhan Kotohu nakatahib nopo nga tanda tatahang do havan pogun tomoimo id noonombo id suang saviavi koozuzuvo di au oihaan do tuhun ginumuan.
Mantad dino ka disido, koulalaho miingat-ingat om maganu tavavagat om osianan kumaa posoihi sungkad tukad nopo nga kiguno montok mongintong ahal ngavi koumohigan popoompit do kiis tavagat.
“Sundung tu tumandu do rekod poguntaban kahasaan tavagat id Semporna nopo nga oniini nga ino okon kilati boogizan pulis popohogos tonggungan mintamong koumohigan uvang diti, saasabap no do potitikid tadau kivaa nopo luputan ahal kahasaan tavagat di otoimo pulis.”
“Koozuzuvo dino kapanaak hizab kumaa puu pulis montok pakalaja miampai hobi mongkimamaa sundung i do ingkaa momoguno o pulis kotuhungan om pisokodungan mogiigizon montok tuutulus popohuzung kopoihaan koumohigan mooi haang tosikap aanu maganu,” ka disido.
Kokomoi koponuidangan balai pulis id Pulau Bum-Bum, pinopointahang i Hamzah louting di momoguno katatadaai kabin kaanu popotindooi kiginumu 337 puu mogisusuvai pangkat montok angkab kalaja koumohigan id posoihi pitakasan uvang dino.
“Iti nopo nga pilotian polinta id suang mongintong koumohigan Tisan Kohisaon Sabah ajamin mantad ponugkuan miampai abaabazan kahasaan tavagat suvai.”
“Ontok timpu di miaga nopo nga nadadi tonggungan potitikid tuhun momogun Malaysia poposogu tosisikap kumaa pulis nung koiho izioho miampai kototongob isai nopo i dati adadi havan Pogun id posoihi dioho om kada kozo piupakat miampai monunugku tu koulalaho miaga dino kopogundoonok koumohigan pogun om ginumuan,” ka disido.
Ontok po nogi dino mokianu nogi isido kopomuanan om mogiigizon kampung tomoimo mambakas posoihi sungkad tukad dioho mooi okon nopo abaakas nga kaanu monguang tampat di koundoosi i dati gunoon tuhun talaat sabaagi tampat dioho.
Naamot dino, minonoimo nogi i Hamzah sakadai RM43,721 montok ‘Tozibut Perwira Lahad Datu’ asil nopuu tuhun ginumuan id uvang dino i pinataak di Upisol Uvang Semporna A.M Ibnu Baba.
Subscribe to:
Posts (Atom)
Recent Comments